Detektivi: Whitney Houston është vrarë

Whitney Houston është vrarë, sipas një detektivi privat amerikan. Paul Huebl, siç publikon ‘The Sun’, ka gjetur prova, përfshirë edhe materiale filmike, që vërtetojnë se këngëtarja ishte viktimë e një sulmi nga dy burra të cilët ishin dërguar për të marrë një borxh që kishte lidhje me substanca narkotike. 

Mendohet se Whitney Houston u kishte 1.5 milionë dollarë borxh disa trafikantëve të rrezikshëm para se të mësohej lajmi i vdekjes së saj në Los Angeles.

Huebl tha për ‘National Enquirer’: “Kam prova se Whitney ka qenë viktimë e një sulmi nga trafikantë droge, të cilët dërguan persona për t’i marrë asaj një shumë të madhe parash që ajo i detyrohej atyre.”

“Trupi i saj ka plagë klasike që i merr një person kur lufton për të mbrojtur jetën e tij. Provat do i shkojnë FBI-së në mënyrë që kjo çështje të rihapet”, shtoi detektivi.

Whitney Houston u gjet pajetë në vaskën e dhomës së saj të hotelit në shkurt të vitit 2012. Analiza toksikologjike tregoi se 48-vjeçarja kishte ndërruar jetë pasi ishte mbytur si pasojë e efektit të kokainës dhe problemeve me zemrën.